Şeykdaun: Antonelli 3-cü gün hamıdan sürətlidir

Barselona yanvar testləri üçün ən ideal yer deyil, lakin Avropadakı bazalara yaxınlıq, tanış konfiqurasiya və rahat qrafik öz rolunu oynayıb.

Məhz hava şəraiti testlərin üçüncü günündə komandaların iş qrafikini müəyyən edib. Əvvəlki gün trasda yalnız Red Bull və Ferrari işləyərkən, bir çoxları bokslarda qalmağa üstünlük verib. Bazar ertəsindən cümə gününə qədər olan beş gündən komandalar yalnız üç günü işləyə bilər və hamı bu vaxtı hava şəraiti ilə optimal şəkildə uzlaşdırmağa çalışıb.

Williams ilk testlərə gəlməyib, Aston Martin yalnız son iki gün üçün qeydiyyatdan keçib, digərləri isə trasın quru olduğu saatları seçib.

Üçüncü gün də hamını bezdirən “məxfilik rejimi” qüvvədə olub – mühafizə əməkdaşları ətraf təpələrdə azarkeşlərin dalınca qaçıb, jurnalistlər bloqerlərə istinad edib, bloqerlər isə jurnalistlərə. Yenə deyilib ki, Berni dövründə belə olmayıb, amma bu, heç nəyi dəyişməyib. Formula 1 informasiya axınını hamı üçün kəsib, hətta əvvəllər hər şeydən xəbərdar olanlar üçün də. Məntiqli “niyə” sualına cavab da olmayıb.

Üçüncü gündə testlər üç dəfə qırmızı bayraqlarla dayandırılıb – əvvəlcə Niko Hülkenberq 10-cu döngədə maşını saxlayıb, sonra Oliver Berman ikinci döngədə dayanıb, axşam isə mövsümün yeganə debütantı Arvid Lindblad çıxışını dayandırıb.

McLaren günü çox da aktiv keçirməyib və öz proqramları üzrə işləyiblər. Mercedes, Alpine, Audi, Haas, Red Bull və Racing Bulls artıq üç gündən ikisini istifadə edib.

Protokola Mercedes pilotları başçılıq edib, ən yaxşı vaxtı isə Kimi Antonelli göstərib – o, dövrəni 1:17.362-lik nəticə ilə tamamlayıb.

McLaren, Ferrari, Cadillac və Aston Martin cümə axşamı və cümə günü testlərdə sərbəst iştirak edə bilər. Nəticədə onların planının necə olacağını görəcəyik…