Aston Martin və Honda əməkdaşlığının başladığını elan edib

Aston Martin və Honda çərşənbə axşamı Yaponiyanın Tokio şəhərində keçirilən xüsusi mövsümöncəsi tədbirdə zavod tərəfdaşlığının başlanğıcını qeyd edib.

Təqdimatda Aston Martin Aramco-nun icraçı sədri Lourens Stroll Honda-nın prezidenti və icraçı direktoru Toşihiro Mibe ilə birlikdə iştirak edib. Formula 1-in prezidenti və icraçı direktoru Stefano Domenikali də tədbirdə olub və səhnəyə çıxıb.

Aston Martin Silverstounda yerləşən komanda kimi 2021-ci ildə Formula 1-ə qayıtdıqdan sonra Mercedes mühərriklərindən istifadə edib, lakin bu vəziyyət 2026-cı ildən və idmanın tamamilə yeni reqlamentləri ilə birlikdə Honda ilə əməkdaşlıq sayəsində dəyişir.

Aston Martin-in keçmiş komanda rəhbəri və hazırkı baş strategiya direktoru Endi Kauell inteqrasiyanın son mərhələlərinə nəzarət edib. O, bunu Mercedes High Performance Powertrains-də uzun və uğurlu fəaliyyəti dövründə topladığı təcrübəyə əsaslanaraq edib. Bu arada Formula 1 dizayn əfsanəsi Adrian Nyui komandanın rəhbəri vəzifəsini üzərinə götürüb.

Lourens Stroll: “Bu gün Tokioda Honda ilə tərəfdaşlığımızın başlanğıcını qeyd etməkdən böyük məmnunluq duyuram. Aston Martin Aramco Formula 1 Team və Honda bir çox dəyərləri bölüşür və məhz bu dəyərlər bizi 2026-cı il və ondan sonrakı dövr üçün bir araya gətirir.

Silverstoundakı AMR Technology Centre ilə Sakurada yerləşən Honda Racing Corporation (HRC) arasındakı güclü əməkdaşlıq tərəfdaşlığımızın dərinliyini nümayiş etdirir. Gələcəkdə qələbə uğrunda mübarizə aparmaq üçün lazım olan bütün elementlərə sahib olduğumuza əminik və Honda-nın güc qurğusuna, eləcə də onun üzərində çalışan mühəndislərə böyük inam bəsləyirik.

Yolumuz həmişə asan olmayacaq və qarşıda çətinliklər qaçılmazdır, lakin qalib gəlmək hər iki şirkəti irəli aparan əsas qüvvədir və biz birlikdə uzun illər uğurlu tərəfdaşlıq gözləyirik”.

Toşihiro Mibe, Honda Motor Corporation-un prezidenti və icraçı direktoru: “Honda-nın avtomobil yarışlarının zirvəsi olan Formula 1-də iştirakı şirkətin qurucusu Soiçiro Honda-nın ruhunun təcəssümü olub. Məhz o, Honda mühəndislərini dünyada birinci olmağa can atmağa və ən çətin çağırışları qəbul etməyə ruhlandırıb.

2026-cı ildə Formula 1 həm şassi, həm də güc qurğusu üzrə əsaslı reqlament dəyişikliklərindən keçəcək. Honda Formula 1-i çağırış və innovasiya simvolu kimi görür və Honda-nın qlobal yarış bölməsi olan HRC bu çağırışlara cavab vermək üçün 2026 mövsümü üçün yeni RA626H güc qurğusunu hazırlayıb.

Dünyada birinci olmaq məqsədi ilə Honda Aston Martin Aramco Formula 1 Team ilə birlikdə çağırışları qəbul etməyə davam edəcək. Bu gün biz həmçinin yenilənmiş dizayna malik yeni “H” nişanını təqdim edirik. Honda bu nişanı avtomobil biznesini təmsil edən yeni simvol kimi qəbul edib və bu, bizim üçün çox önəmli məqamdır, çünki Honda-nın avtomobil biznesindəki transformasiyanı ifadə edir”.

Stefano Domenikali: “Bu, Formula 1 üçün həyəcanlı bir andır, çünki Honda və Aston Martin Aramco Formula 1 Team idmanın ən böyük mükafatı uğrunda mübarizə aparmaq üçün bir araya gəlir. Formula 1 Yaponiyada ilk dəfə 1976-cı ildə keçirilib, 1987-ci ildən isə Suzukaya keçib. Bu ölkə ilə dərin sədaqət və bağ mövcuddur, çünki illər ərzində rekord sayda – 13 dünya çempionluğu məhz burada müəyyənləşib.

Yaponiyada Formula 1 sürətlə inkişaf edir və hazırda burada təxminən 17 milyon ehtiraslı azarkeş var. Ötən il Suzukadakı Yaponiya Qran Prisi həftəsonu ərzində 266 min tamaşaçı qəbul edilib və Yaponiyada televiziya baxışları əvvəlki illə müqayisədə 26 faiz artıb. Honda-nın bu il Formula 1-ə qayıdışı idmanın Yapon bazarındakı potensialını daha da artıracaq.

2026-cı il üçün nəzərdə tutulan yeni nəsil reqlamentlər Honda-nı yenidən Formula 1-ə cəlb edən əsas amillərdən biridir. Bu reqlamentlər idman tarixində ən böyük yenilənmə çərçivəsində həm şassinin, həm də güc qurğularının dəyişməsini nəzərdə tutur. Performansa təsir etmədən qabaqcıl dayanıqlı yanacaqla işləyən sadələşdirilmiş hibrid mühərriklər tətbiq olunacaq.

Formula 1 Honda və Aston Martin Aramco Formula 1 Team-in davamlılığa sadiqliyini bölüşür və 2018-ci illə müqayisədə 2024-cü ilin sonunadək karbon emissiyalarını 26 faiz azaltmaqla 2030-cu il üçün Net Zero hədəfinə doğru irəliləyir. Formula 1 qarşıdakı innovasiyaları alqışlayır və Honda kimi tərəfdaşlarla birlikdə sərhədləri genişləndirmək üçün çalışır”.

Aston Martin–Honda ittifaqı üçün növbəti mərhələ yanvarın 26–30-da Barselonada keçiriləcək Şeykdaun həftəsi olacaq. Daha sonra komanda fevralın 9-da Səudiyyə Ərəbistanında, İthrada mövsümün rəsmi təqdimatını keçirəcək.