İkinci qış testləri: Rassell yaxşı başlayıb

Adətən testlərin hər keçən günü nasazlıqlar və itirilən vaxt azalır, lakin həm reqlamentdəki böyük dəyişikliklərə, həm də test proqramının uzunluğuna görə bu il vəziyyət fərqlidir.

Final seriyasının ilk günü (Barselonada mümkün beş gündən üçü nəzərə alınmaqla) çox komanda üçün yeddinci gün sayılıb, amma dayanma halları hətta ilk günlərdəkindən də çox olub. Demək olar ki, hamı trasa çıxıb – protokola 21 sürücü düşüb, yalnız Maks Ferstappen kənardan baxıb.

Aston Martin-də yenə Honda güc qurğusunun problemləri yaranıb, Fernando Alonso cəmi 28 dövrə vura bilib. Sonra mühərrik dəyişdirilib, günortadan sonra sükan arxasına keçən Ləns Stroll isə 11-ci döngədən əvvəl ötürmələr qutusu xarab olduğu üçün trasdan çıxıb və qırmızı bayraqlara səbəb olub.

Səhər Ayzek Həcər 13 dövrə vurub və soyutma sistemi ilə bağlı problemə görə boksda dayanıb. Red Bull təmir üçün boksa çəkilib, maşını yenidən işlək hala gətirib və fasilədən sonra fransız sürücü yenidən trasa çıxıb.

Ferrari səhər yeni arxa qanadla diqqət çəkib, Şarl Lekler ən yaxşı nəticəni göstərib. Amma günortadan sonra Lyuis Həmilton bir saatdan çox gözləyib – mexaniklər konfiqurasiyanı dəyişib, komanda iki fərqli aerodinamik variantı müqayisə edib və qalan vaxt ərzində o, aerodinamik boya ilə ardıcıl dövrələr vurub.

Cadillac üçün gün yenə uğursuz alınıb. Səhər Serxio Peres sensor problemlərinə görə cəmi 24 dövrə vurub, günortadan sonra Valtteri Bottas isə sessiyanın ortalarında trasa çıxıb. Günün gedişində sürücülər mübarizə və ötmə sınaqları da edib, amma şərait bərabər olmayıb – hamı fərqli yanacaq yükü ilə işləyib.

Sessiyanın sonunda FIA-nın xahişi ilə sürücülər təhlükəsizliklə bağlı narahatlıqlara cavab olaraq yenilənmiş start prosedurunu sınaqdan keçirib.

Gün ərzində Niko Hülkenberqin Audi-si start imitasiyası zamanı sönüb. Günün sonunda isə artıq heç kimdə belə hal baş verməyib, amma startlar qəribə görünüb və qəribə səslənib. Startda turbinlərin yüksələn uğultusuna öyrəşmək lazım olacaq.

Corc Rassell 1:33.459-lük nəticə göstərib və bu, hələlik Bəhreyndəki testlərin ən yaxşısı olub.

Testlər sabah davam edəcək.