Yaponiya-2026: Rassell qaldığı yerdən davam edir

Səhər Suzuka trasında quru, günəşli, amma küləkli hava olub. Pilotlar ilk dəqiqələrdən trasa çıxıb. Komandalar çoxlu yeniliklər gətirib, bir çox maşın aerodinamik sensorlar və xüsusi boya ilə test edilib.

Aston Martin komandasında bir gün əvvəl ilk övladının dünyaya gəlməsi səbəbilə media gününü buraxan Fernando Alonsonun yerinə sükan arxasına gənc Cek Krouford keçib. Fernando səhər Suzukaya gəlib və onun işini bokslardan izləyib.

Norris sessiyanın əvvəlində nəticə göstərmədən maşını mexaniklərə qaytarıb, daha sonra trasa çıxıb, lakin ilk 20 dəqiqəni itirib.

Rassell, Lindblad, Louson, Norris və Lekler trasdan kənara çıxsalar da, maşınlara zərər dəyməyib. Aleks Elbon isə 9-cu döngənin çıxışında çınqıllığa düşüb və qəzadan son anda qurtulub – sol arxa təkərlə baryerə toxunub.

Louson və Sayns 11-ci döngədə trası bölüşə bilməyiblər. Lyam əvvəl onu keçib sonra isə qarşısında yavaşlayan Karlosun hərəkətindən narazı qalıb.

Peres və Elbon şikanada mövqe uğrunda mübarizə apararkən toqquşublar – karbon hissələr dağılıb və hər iki pilot boksa qayıdıb. Stüardlar bu insidenti sessiyadan sonra araşdıracaqlar.

Sessiyanın protokoluna Corc Rassell başçılıq edib – o, 1:31.666-lıq nəticə göstərib. İlk onluqdakı bütün pilotlar bir saniyə daxilində qərarlaşıb.